د افغانستان د کرکټ ملي لوبډله څو ورځې وړاندې زمبابوې ته ورسېدله. دوی د زمبابوې له ملي لوبډلې سره تر رسمي لوبو مخکې د دغه هېواد د چیرمن له لوبډلې سره دوه لوبې وکړې او دواړه یې وګټلې.
دویمه لوبه یې د نوي روزونکي انضمام الحق تر روزنې لاندې وشوه، چې افغان منډه جوړوونکي په کې ډېر و نه ځلېدل.
د پاکستان پخوانی مشهور منډه جوړوونکی، انضمام الحق، څو ورځې وړاندې زمبابوې ته ورسېد او د افغانستان د کرکټ د ملي لوبډلې د مشر روزونکي په توګه یې دنده پیل کړه.
د شنبې د ورځې په لوبې کې افغانستان مخالفې لوبډلې ته د ۲۱۸ منډو هدف ورکړ، خو چېرمن لوبډله په ۴۳ اورونو کې په ۲۰۳ منډو وسوځېدله.
په افغان منډه جوړوونکو کې تر ټولو ډېرې ۷۲ منډې محمد شهزاد وکړې، خو په توپ اچوونکو کې بیا کې دولت ځدراڼ، حمزه هوتګ، میرویس اشرف، محمد نبي او افتاب علم دوه دوه مخالف لوبغاړي وسوځول.
افغانستان د جمعې په ورځ د زمبابوې له ملي لوبډلې سره د پنځو لوبو د لړۍ لومړنۍ لوبه کوي، دویمه یې په ۱۸، درېیمه یې په ۲۰، څلورمه یې په ۲۲ او پنځمه نړیواله لوبه یې په ۲۴ نېټه ده.
د ۲۰ اورونو لوبې بیا په ۲۷ او ۲۹ نېټو باندې کیږي.
دا لومړی ځل دی چې افغانستان د کرکټ د نړیوالې شورا له یو بشپړ غړي سره په یو وار دومره ډېرې لوبې کوي.
افغانستان تېرکال له زمبابوې سره په څلورو لوبو کې یې دوه وګټلې.
