د افغانستان د اسلامي جمهوري دولت مذاکراتي پلاوی له طالبانو سره د خبرو لپاره قطر ته ورسېده.
د دولت دا مذاکراتي پلاوی ۲۱ غړي لري.
په پلاوي کې د ملي مصالحې د شورا مشر عبدالله عبدالله او د افغانستان د بهرنیو چارو سرپرست وزیر حنیف اتمر هم شامل دي.
دوی به سبا د شنبې په ورځ سپتمبر ۱۲ (وږي۲۲) د قطر په مشهور هوټل «شریتون» کې د بین الافغاني مذاکراتو د پیل په مراسمو کې ګډون وکړي.
ښاغلي عبدالله په الوتکه کې خبریالانو ته وویل چې قطر ته د سولې له هیلو سره ځي او اوربند به یې د خبرو په اجنډا کې مهم بحث وي.
ډاکتر عبدالله عبدالله وویل تمه مو دا ده چې د سولې په خبرو کې پرمختګ وشي.
د بهرنیو چارو وزارت سرپرست حنیف اتمر بیا وویل نشي ویلی چې دا ځل مذاکرات به څومره وغځیږي.
له طالبانو سره د بین الافغاني مذاکراتو د پیل مراسم سبا دي، چې د قطر د بهرنیو چارو به یې پرانیزي.
د طالبانو له اړخه به ملا عبدالغني برادر او د افغانستان د حکومت له ادرسه به د مصالحې د عالي شورا مشر ډاکټر عبدالله عبدالله وینا وکړي.
د امریکا د بهرنیو چارو وزیر مایک پمپیو هم په دغو مراسمو کې ګډون کوي.
د دغو خبرو اصلي هدف په افغانستان کې د روانې جګړې ختمول بلل کیږي. امریکا او ځینو نورو هېوادونو د دغو خبرو د پیلېدو هرکلی کړی دی.
